#رسالة_مؤثرة….من طرف “ماليك رياحي” إلى أمه

#رسالة_مؤثرة
. من طرف “ماليك رياحي” إلى أمه

رسالة الى امي الغالية وكل الاحرار :
بسم الله الرحمن الرحيم والصلاة والسلام
على اشرف المرسلين الى اغلى واروع امراة في الدنيا امي اما بعد اولا نبغيك تمسحي هذوك الدموع وتتبسمي نتمنى تكوني بخير على بخير وفي صحة جيدة توحشتك بزاف ماما نطمنك بلي راني بخير الحمد لله الله غالب دخلت للحبس في زمن الكورونا وين مكانش وممنوع عليك تزوريني على جال المرض راكي عارفا انا راني بصحة جيدة ومعنوياتي في السماء هي صح راني في السجن والضيق صعيب ولكن هذه هي سنة الحياة الحمد لله مادخلتش السجن على خاطر سرقت ولا كليت حق الناس ولا درت حاجا لي تغضب ربي الله غالب دخلت السجن لانني قلت كلمت الحق وما ادراك ماكلمة الحق في بلاد عندها سلطان جاءير نتمنى من كل اعماق قلبي فخورة بيا الحمد لله منذ اليوم الاول لي دخلت فيه السجن مالقيت ولامشكل سواء مع حراس السجون ولا مع المساجين لقيت اغلبيتهم يعرفوني وزيادة على هذا الشيء يحترمونني ويقدروني وراني منضبط هنا صح الحال صعيب شوية مشي كيما برا ولكن كل مؤمن مصاب شدة وتفوت وانشاء الله راح نرجعلك اكثر قوة ونعوضك قاع لي فات تقريبا كامل الناس هنا يقولولي الله يرحم الكرش لي جابتك انا فخور جدا بيك ياامي وبتربيتك لي احسن تربية علمتيني في حياتي معنى الصبر وربي قال كل صابر ينال نتمنى مانكونش زعفتك يجب عليك الصبر ثم الصبر وربي يفتحها علينا ان شاء الله ضرك راني نغتنم الفرصة مع ربي راني ندعيلك ربي يبعد عليك هذا المرض ويطول في عمرك وتفرحي بيا كي نخرج ونتزوج لازم عليك تصبري هذا اليمات على خاطر منقدرش نهدر معاك ومنقدرش نشوفك حتى ربي يرفع علينا هذا الوباء والبلاء نتمنى ماتكونيش تخرجي بزاف وكي تسحقي كاش حاجة قولي لخوتي يشروهالك وانتي ريحي في الدار وحضي روحك مليح وتهليلي في روحك انتي هي اعز ما املك في هذه الدنيا وراني كسرت الشرع وباذن الله هذا المرة اثبت براءتي ونخرج من هذا الضيق وتشوفيني انشاء الله سلمي بزاف على خوتي لي وقفو معايا في غيابي عن الدار وسلمي على قاااااع لي زارنا وسقسا عليا راني نخمم فيك في كل وقت سمحيلي ماما لي قلقتك دموعك غاليين عليا بزاف صبرا يااماه ان الله مع الصابرين.
ابنك مناضل رياحي ماليك احبك يااغلى ما أملك أمي.

المصدر : الأستاذ كمال رشيد لوح